اسلام آباد: (دنیا نیوز) عدالت نے شہید ذوالفقار علی بھٹو یونیورسٹی کو ایم ڈی کیٹ کے نتائج جاری کرنے کی مشروط اجازت دے دی۔
اسلام آباد ہائی کورٹ کے جسٹس ارباب محمد طاہر نے طلبہ کی درخواست پر سماعت کی، اسلام آباد ہائی کورٹ نے کہا کہ ایم ڈی کیٹ کا نتیجہ عدالت کے حتمی آرڈر سے مشروط ہو گا۔
واضح رہے کہ گزشتہ روز اسلام آباد ہائی کورٹ نے شہید ذوالفقار علی بھٹو یونیورسٹی کو ایم ڈی کیٹ کے نتائج جاری کرنے سے روک دیا تھا۔
جسٹس ارباب محمد طاہر نے 3 صفحات پر مشتمل تحریری حکم جاری کیا تھا اور کہا تھا کہ جامعہ تاحکم ثانی ٹیسٹ کے نتائج جاری نہ کرے۔
واضح رہے کہ ایم ڈی کیٹ ٹیسٹ کے خلاف 6 طالب علموں نے اسلام آباد ہائی کورٹ میں درخواست دائر کی تھی، طلبہ کا مؤقف ہے کہ ٹیسٹ میں 200 میں سے 26، 27 ایم سی کیوز آؤٹ آف سلیبس تھے۔
