کراچی: (دنیا نیوز) گورنر سندھ کامران خان ٹیسوری کے سندھ یونیورسٹیز اینڈ انسٹیٹیوٹ ترمیمی بل 2025 پر اعتراضات، گورنر سندھ نے اعتراضات کے ساتھ ترمیمی بل سندھ اسمبلی واپس بھیج دیا۔
گورنر سندھ کامران ٹیسوری نے اعتراض عائد کیا کہ وفاقی ہائرایجوکیشن کمیشن کی واضح ہدایات کے تحت وائس چانسلر ایک ماہر تعلیم ہونا لازمی ہے، وفاقی ہائر ایجوکیشن کمیشن کی ہدایات پر دیگر صوبے بھی عمل پیرا ہیں۔
کامران ٹیسوری نے کہا کہ پی ایچ ڈی کے حامل افراد علمی قیادت، تحقیق اور انتظامی معاملات پر گہری سمجھ رکھتے ہیں، بیوروکریٹس کی تقرری تعلیمی معیاراور تحقیق کے ضمن میں پورا نہیں اترتی ہے۔
گورنر سندھ کا کہنا تھا کہ بیوروکریٹس طلبہ، فیکلٹیز اورمحققین کی علمی ضروریات پوری طرح سمجھ نہیں سکتے، اٹھائے گئے اعتراضات پر نظر ثانی کی جائے۔
