اسلام آباد: (ویب ڈیسک) وزیراعظم کی کوآرڈینیٹر برائے ماحولیاتی تبدیلی رومینہ خورشید عالم سے سویڈن کی سفیر نے ملاقات کی۔
وزیراعظم کی کوآرڈینیٹر برائے ماحولیاتی تبدیلی رومینہ خورشید عالم نے خواتین کی اقتصادی ترقی و ماحولیاتی پائیداری کے لیے پائیدار صنعتوں خاص طور پر فیشن کی ری سائیکلنگ کےابھرتے ہوئے شعبے کو بااختیار بنانے کے لیے مناسب اقدامات اٹھانے کی ضرورت پر زور دیا ہے۔
رومینہ خورشید نے ملاقات میں کہا کہ خواتین کو ری سائیکلنگ اور پائیدار فیشن جیسے شعبوں میں شامل کرکے ہم سبز معیشت کو ترویج دے سکتے ہیں جبکہ خواتین کو معاشی ترقی کے مواقع فراہم کر کے ان کی اہمیت کو تسلیم بھی کر سکتے ہیں۔
انہوں نے ماحولیاتی چیلنجز کے مقابلے میں خواتین کی زیادہ حساسیت کا ذکر کرتے ہوئے ماحولیاتی تبدیلی کے خلاف جنگ میں خواتین کو بااختیار بنانے کی فوری ضرورت پر زور دیا۔
رومینہ خورشید عالم نے بلوچستان میں جاری فلاحی کاموں کا بھی ذکر کیا، جہاں وہ لڑکیوں، نوعمروں اور خواتین کو مالی طور پر بااختیار بنانے پر توجہ مرکوز کر رہی ہیں، ان کا مقصد مالی آزادی کے لیے ایک راستہ پیدا کرنا ہے جبکہ پاکستان کے سب سے زیادہ موسمیاتی حساس علاقے میں ماحولیاتی تبدیلی کے اثرات سے نمٹنا بھی ہے۔
سویڈن کی سفیر نے رومینہ خورشید عالم کو اسلام آباد میں 26 فروری کو منعقد ہونے والے سیمینار میں مدعو کیا، جس میں سویڈش ٹیکنالوجی کے ماہرین ٹیکسٹائل انڈسٹری کے لیے جدید حل پر اپنے خیالات شیئر کریں گے۔
