مظفر آباد: (دنیا نیوز) لائن آف کنٹرول پر بھارتی فوج کی بلااشتعال گولہ باری کاسلسلہ جاری، آزاد کشمیر میں بھارتی بربریت سے معصوم اور نہتے شہری شدید زخمی ہو گئے۔
سکیورٹی ذرائع کے مطابق بھارتی فوج کی بلااشتعال گولہ باری سے تحصیل ہجیرہ میں مکانات کو بھی شدید نقصان پہنچا، معصوم اور نہتے کشمیری شدید زخمی ہوئے۔
گولہ باری سے زخمی افراد کا کہنا ہے کہ بھارتی جارحیت کے باوجود ہمارے حوصلے بلند ہیں، آزاد کشمیر کی تحصیل ہجیرہ کے رہائشی زخمی محمد رفیق کے بھتیجے کا کہنا تھا کہ ’’رات بھارتی فوجی کی بلااشتعال گولہ باری سے میرے چچا شدید زخمی ہو گئے‘‘۔
زخمی محمد رفیق نے کہا کہ میرے چچا کی ٹانگ دو جگہ سے فریکچر ہو چکی ہے، ہمارے حوصلے بلند ہیں اور ہم انشاء اللہ مقابلہ کرینگے۔
زخمی معاویہ نواز نے کہا کہ رات کو بھارت نے بربریت کا مظاہرہ کرتے ہوئے بلااشتعال فائرنگ کی، بھارت کی بلااشتعال فائرنگ سے بہت سے گاؤں متاثر ہوئے ہیں۔
.jpg)
معاویہ نواز نے کہا کہ بھارت کی جانب سے فائر کیا گیا شیل میری ٹانگ پر لگا جس سے ٹانگ ضائع ہو گئی ہے، بھارت کی بلااشتعال فائرنگ سے کچھ لوگوں کی شہادت بھی ہوئی۔
سکیورٹی ذرائع کے مطابق بھارتی فوج کی بلااشتعال گولہ باری سے عباس پور کے گاؤں لاسری منگ میں مکانات تباہ ہوئے، بھارتی گولہ باری سے عباس پور میں کسی طرح کا جانی نقصان نہیں ہوا۔
دفاعی ماہرین کا کہنا ہے کہ بھارتی فوج کی جانب سے شہری آبادی پر فائرنگ اور گولہ باری بین الاقوامی قوانین کی سنگین خلاف ورزی ہے، بھارت آزاد کشمیر کے نہتے شہریوں پر گولہ باری کر کے پاک فوج کے ہاتھوں ملنے والی ہزیمت کو مٹا رہا ہے۔
