لاہور: (دنیا نیوز) پراسیکیوٹر جنرل پنجاب سید فرہاد علی شاہ نے سیالکوٹ میں مسیحی نوجوان کے بہیمانہ قتل کے واقعہ کا نوٹس لیتے ہوئے کیس کو ہائی پروفائل قرار دیا۔
پراسیکیوٹر جنرل پنجاب سید فرہاد علی شاہ نے واقعہ پر تفتیشی افسر کو ریکارڈ سمیت طلب کر لیا۔
پراسیکیوٹر جنرل پنجاب نے کہا ہے ہر کسی کے جان مال کا تحفظ کرنا پراسیکیوشن کی ذمہ داری ہے، اقلیتوں کا تحفظ بھی ریاست کی ذمہ داری ہے، ریاست اقلیتی برادری کے ساتھ ہے، بلا تفریق کارروائی کر کے ملزمان کو کیفرکردار تک پہنچایا جائے گا، مکمل انصاف فراہم کیا جائے گا، مریم نواز کے ویژن کے تحت پراسیکیوشن انصاف کی فراہمی کیلئے دن رات محنت کر رہی ہے۔
واضح رہے کہ مسیحی نوجوان کے قتل کا مقدمہ سیالکوٹ کے تھانہ موترہ میں درج ہے، ایف آئی آر کے متن کے مطابق کاشف مسیح کو بہیمانہ تشدد کر کے ٹانگوں میں کیل ٹھونکے گئے، ملزمان نے ڈنڈے اور سوٹوں سے تشدد کا نشانہ بنایا جس سے کاشف شدید زخمی ہو گیا، بعدازاں کاشف زخموں کی تاب نہ لاتے ہوئے جان کی بازی ہار گیا۔
