لاہور: (دنیا نیوز) سپیکر پنجاب اسمبلی ملک احمد خان نے کہا کہ میری بات کو غلط انداز میں پیش کیا جا رہا ہے، کسی کو بھی ایوان میں ہلڑبازی کی اجازت نہیں دی جاسکتی، قواعد و ضوابط کے مطابق اپنی ذمہ داریاں ادا کر رہا ہوں۔
تقریب سے خطاب کرتے ہوئے سپیکر پنجاب اسمبلی ملک احمد خان نے کہا کہ جمہوری نظام میں پارلیمانی نظام کی بڑی اہمیت ہے، ہاؤس میں سپیکر کا کردارایک کسٹوڈین کا ہوتا ہے، سپیکر قواعد و ضوابط کے مطابق ایوان کی کارروائی کو چلاتا ہے۔
ملک احمد خان نے کہا کہ جمہوری نظام میں عدلیہ،مقننہ اور پارلیمان اپنا اپنا کردار ادا کرتے ہیں، پارلیمانی نظام میں قائمہ کمیٹیوں کا کردار اہم ہوتا ہے، منتخب نمائندے آئین کی پاسداری کا حلف اٹھاتے ہیں۔
سپیکرپنجاب اسمبلی کا کہنا تھا کہ آئین کی پاسداری منتخب نمائندوں پر لازم ہے، کسی بھی موقع پر قوانین کو معطل نہیں کیا، کسی بھی سیاست دان کے بچوں کے پاپا چور نہیں کہنا چاہئے، ایسا تو سکول میں بھی نہیں ہوتا۔
ملک احمد خان نے کہا کہ اپوزیشن اور حکومت اگر بیٹھے تو بڑی اچھی بات ہے، حکومت اور اپوزیشن کو ساتھ بٹھانے کے لیے کردار ادا کرنے کو تیار ہوں، اپوزیشن اور حکومت بیٹھ کر آپس میں طے کریں۔
سپیکر پنجاب اسمبلی کا کہنا تھا کہ اپوزیشن لیڈر نے کہا ہے بات چیت کے لیے تیار ہوں، میرے فیصلہ کرنے میں ابھی تو 25 دن ہیں، ابھی تو میں قوانین کو دیکھ رہا ہوں، مختلف عدالتی فیصلوں کو پڑھ رہا ہوں۔
