اسلام آباد: (دنیا نیوز) وفاقی کابینہ نے ای او بی آئی پنشنرز کی پنشن میں 15 فیصد اضافے کی منظوری دے دی۔
وزیراعظم شہباز شریف کی زیر صدارت وفاقی کابینہ کا اجلاس ہوا جس میں اہم سیاسی اور اقتصادی امور پر تبادلہ خیال کیا گیا۔
اجلاس میں کابینہ نے ای او بی آئی پنشنرز کی پنشن میں 15 فیصد اضافے کی منظوری دی، اضافے کا اطلاق یکم جنوری 2025 سے کیا جائے گا۔
وزیراعظم نے وفاقی کابینہ اجلاس سے خطاب کرتے ہوئے کہا کہ محرم الحرام کی مجالس کے پرامن انعقاد پر پوری پاکستان قوم، چاروں صوبوں کے وزرائے اعلیٰ اور وزیر داخلہ محسن کو مبارکباد پیش کرنا چاہتا ہوں۔
شہباز شریف کا کہنا تھا کہ ہماری کابینہ کو ڈیڑھ سال کا عرصہ گزر گیا ہے، اب ہر 2 ماہ بعد ہر وزارت کی کارکردگی کو جانچیں گے، اچھے نتائج پر شاباش دیں گے اور خامیوں کو دور کرنے کی کوشش کریں گے اور اس کیلئے میں کسی تادیبی کارروائی سے پیچھے نہیں ہٹوں گا۔
