اسلام آباد:(دنیا نیوز) وفاقی دارالحکومت میں سیاسی جماعت کی جانب سے اسلام آباد میں ممکنہ احتجاج کے معاملہ پر ضلعی انتظامیہ کی جانب سے انتباہ جاری کر دیا گیا۔
ڈی سی اسلام آباد کے مطابق کسی بھی غیر قانونی سرگرمی کا حصہ بننے والوں کی فی الفور گرفتاری ہوگی، وفاقی دارالحکومت میں دفعہ 144 کا نفاذ ہے، دفعہ 144 کے تحت کسی بھی قسم کے اجتماع یا اکٹھ پر پابندی عائد ہے۔
ڈپٹی کمشنر کا مزید کہنا تھا کہ دفعہ 144 کی خلاف ورزی کی صورت میں سخت قانونی کاروائی عمل میں لائی جائے گی، جب کہ ضلعی انتظامیہ نے شہریوں سے کسی بھی غیر قانونی سرگرمی کا حصہ نہ بننے کی اپیل کی ہے۔
دوسری جانب ذرائع نے بتایا کہ اسلام آباد پی ٹی آئی کا پانچ اگست کو ممکنہ احتجاج کے پیش نظر پولیس کا اسلام آباد کے مختلف سڑکوں پر اڑھائی ہزار پولیس اہلکار تعینات کرنے کا فیصلہ کرلیا۔
ذرائع نے مزید کہا کہ پولیس نے ممکنہ احتجاج کے باعث سکیورٹی پلان مرتب کر لیا، انتظامیہ کی جانب سے کسی کو احتجاج کا اجازت نامہ نہیں دیا گیا، بغیر اجازت خلاف ورزی پر مظاہرین کے خلاف قانونی کارروائی عمل میں لائی جائے گی۔
