اسلام آباد: (دنیا نیوز) چیئرمین پاکستان تحریک انصاف (پی ٹی آئی) بیرسٹر گوہر نے کہا ہے کہ کل کا احتجاج کامیاب ہوا، عوام سڑکوں پر آئے اور آواز اٹھائی۔
اسلام آباد میں پارلیمنٹ ہاؤس میں میڈیا سے گفتگو کرتے ہوئے بیرسٹر گوہر کا کہنا تھا کہ آزاد کشمیر سمیت پاکستان کے 170 اضلاع، تمام تحصیلوں اور یونین کونسلز میں بھرپور احتجاج ہوا۔
انہوں نے کہا کہ ہم پر امن لوگ ہیں، کل بھی پر امن احتجاج ہوا، کل عوام نے ثابت کیا کہ بانی پی ٹی آئی کے ساتھ ہے۔
چیئرمین پی ٹی آئی کا کہنا تھا کہ پہلی مرتبہ ایسا الیکشن کمیشن ہے جو خود اسٹے پر ہے، الیکشن کمیشن کے پاس ڈائریکٹ نوٹیفکیشن کرنے کا اختیار نہیں ہے، الیکشن کمیشن نے غیر آئینی طور پر تینوں اپوزیشن لیڈران کی نااہلی کے نوٹیفیکشن جاری کئے۔
انہوں نے کہا کہ ہم الیکشن کمیشن کا یہ اقدام چیلنج کریں گے، ہمیں سنا ہی نہیں گیا، الیکشن کمیشن کو ہمیں سننا چاہیے تھا، تینوں اپوزیشن لیڈران کی جگہ کسی کو نامزد نہیں کریں گے۔
بیرسٹر گوہر کا مزید کہنا تھا کہ سپیکر قومی اسمبلی سردار ایاز صادق نے بہت مایوس کیا، ہمارا احتجاج جاری رہے گا۔
