چیف جسٹس پاکستان کو ملنے والی سالانہ پنشن، مراعات کی تفصیلات سینیٹ میں پیش

اسلام آباد: (دنیا نیوز) ریٹائرمنٹ کے بعد سپریم کورٹ کے چیف جسٹس کو ملنے والی سالانہ پنشن اور مراعات کی تفصیلات سینیٹ میں پیش کر دی گئیں۔

سال 2010 سے 2024 تک پنشن میں کیے گئے اضافے کی تفصیلات بھی پیش کی گئیں، 2010 میں چیف جسٹس کو 5 لاکھ 60 ہزار پنشن ملتی تھی، 2011 میں چیف جسٹس کی پنشن 6 لاکھ 44 ہزار ہو گئی۔

2012 میں چیف جسٹس کی پنشن 7 لاکھ 73 ہزار ہو گئی، 2013 میں 8 لاکھ 50 ہزار، 2014 میں 9 لاکھ 35 ہزار، 2015 میں 10 لاکھ 5 ہزار اور 2016 میں چیف جسٹس کی پنشن 11 لاکھ 5 ہزار ہو گئی۔

سال 2017 میں چیف جسٹس کی پنشن 12 لاکھ 17 ہزار ہو گئی، 2018 میں 13 لاکھ 38 ہزار، 2021 میں 14 لاکھ 52 ہزار، 2023 میں 16 لاکھ 57 ہزار، 2024 میں چیف جسٹس کی پنشن 23 لاکھ 90 ہزار ہو گئی۔

چیف جسٹس کی بیوہ کو ملنے والی پنشن کی تفصیلات بھی پیش سینیٹ میں پیش کی گئیں جس کے مطابق جج کی بیوہ کو ڈرائیور، اردلی ملے گا، جج کی بیوہ کو ماہانہ 3 ہزار لوکل ٹیلی فون کالز کی سہولت ہوگی۔

اعداد و شمار کے مطابق جج کی بیوہ کو 2 ہزار بجلی اور مفت پانی کی سہولت بھی حاصل ہے، جج کی بیوہ کو ماہانہ 300 لٹر پٹرول بھی دیا جاتا ہے، جج کی بیوہ سے انکم ٹیکس نہیں لیا جائے گا۔