کراچی: (دنیا نیوز) سندھ کے سینئر وزیر شرجیل انعام میمن نے کہا ہے کہ پاک افواج نے جس طرح بھارت کو دھول چٹائی اس کی مثال نہیں ملتی، ہماری فوج نے بھارت کو عبرتناک شکست دی۔
کراچی میں خصوصی آزادی ٹرین کی روانگی کی تقریب میں میڈیا سے گفتگو کرتے ہوئے شرجیل میمن کا کہنا تھا کہ بلاول بھٹو نے نریندر مودی جیسے دہشت گرد کو دنیا بھر میں ایکسپوز کیا، بلاول بھٹو نے دنیا کو مودی کا اصل چہرہ دکھایا، پوری بھارتی عوام آج مودی پر تنقید کر رہی ہے۔
انہوں نے کہا کہ اختلافات ختم کر کے ہمیں ایک قوم بن کر چیلنجز کا سامنا کرنا چاہیے، وزیر اعلیٰ سندھ نے تمام سیاسی جماعتوں کو اجلاس میں بلایا۔
صوبائی وزیر کا کہنا تھا کہ پاکستان سب سے زیادہ دہشت گردی کا شکار رہا ہے، ہماری افواج نے جانوں کے نذرانے پیش کیے، ہم صرف امن چاہتے ہیں، پاکستان ایک متحد قوم ہے ہمیں یہ پیغام دنیا کو دینا ہے۔
قبل ازیں محکمہ ثقافت و سیاحت سندھ کی جانب سے خصوصی آزادی ٹرین کراچی سے تھرپارکر کیلئے روانہ کی گئی، اس موقع پر کراچی کے کینٹ سٹیشن پر فنکاروں نے فن کا مظاہرہ کیا، جشن آزادی کی مناسبت سے 78 پاؤنڈ کا کیک بھی کاٹا گیا۔
