غذر: (دنیا نیوز) سیلاب نے تباہی مچادی، گوپس کے گاؤں خلتی میں ایک ہی خاندان کے 6 افراد سیلابی ریلے میں بہہ گئے۔
ذرائع کے مطابق سیلابی ریلے میں بہنے والے 2 افراد کی لاشیں نکال لی گئیں ، ایک بچے کو زندہ بچا لیا گیا جبکہ دیگر تین افراد کی تلاش جاری ہے۔
ضلعی انتظامیہ کے مطابق سیلابی ریلوں سے غذر میں مجموعی طور پر 8 اموات ہوئیں، خلتی میں 10 گھر جبکہ دائین میں 70 مکانات سیلابی ریلے کی زد میں آئے، دائین کا معلق پل سیلاب میں بہنے سے علاقے کا زمینی رابطہ منقطع ہوکر رہ گیا ہے۔
غذر کے علاقے دائین میں بلور نامی 70 سالہ شخص سیلابی ریلے کی زد میں آکر جاں بحق ہوا جبکہ سات سالہ بچی لاپتہ ہے، چٹورکھنڈ اور دائین سے آنے والے سیلابی ریلے نے دریائے اشکومن کا بہاؤ روک دیا ہے۔
ضلعی انتظامیہ کا کہنا ہے کہ دریا کا بہاؤ رکنے سے مصنوعی جھیل بن گئی ہے، دریائے اشکومن پر بننے والی جھیل کسی بھی وقت پھٹ سکتی ہے۔
.jpg)
