پشاور: (دنیا نیوز) خیبر پختونخوا حکومت نے ہیلی کاپٹر حادثے پر آج یوم سوگ منانے کا اعلان کیا ہے، صوبے بھر میں قومی پرچم سرنگوں رہے گا۔
وزیراعلیٰ خیبر پختونخوا علی امین گنڈا پور کا کہنا ہے کہ شہدا کے اہلخانہ کے غم میں برابر کے شریک ہیں، ہیلی کاپٹر عملے نے دوسروں کی جانیں بچانے کیلئے اپنی جانیں قربان کردیں، یہ ہمارے اصل ہیرو ہیں، ان کی قربانی تاریخ میں سنہرے حروف میں لکھی جائے گی۔
علی امین گنڈا پور کا کہنا تھاکہ کلاؤڈ برسٹ کی وجہ سے بھیانک قسم کے سیلابی ریلے آئے ہیں، لوگوں کے جان و مال کے تحفظ کیلئے تمام اقدامات یقینی بنا رہے ہیں، مشکل کی اس گھڑی میں صوبائی حکومت عوام کے ساتھ کھڑی ہے۔
انہوں نے مزید کہا کہ صوبائی حکومت نقصانات کا مکمل ازالہ کرے گی، مل کر بہت جلد صورتحال پر قابو پا لیں گے۔
واضح رہے کہ امدادی کارروائیوں میں مصروف خیبرپختونخوا حکومت کا ہیلی کاپٹرکریش کرگیا جس کے نتیجے میں 5 افراد شہید ہوگئے تھے، خیبرپختونخوا حکومت کے ترجمان فراز مغل نے امدادی کارروائیوں کے لیے جانے والے ہیلی کاپٹر کے کریشن ہونے کی تصدیق کی تھی۔
وزیراعلیٰ خیبرپختونخوا علی امین گنڈا پور نے کہا تھا کہ باجوڑ کے بارشوں سے متاثرہ علاقوں کے لئے امدادی سامان لے جانے والا صوبائی حکومت کا ایم آئی 17 ہیلی کاپٹر خراب موسم کی وجہ سے کریش کر گیا تھا۔
