اسحاق ڈار سے برطانیہ کے پارلیمانی انڈر سیکرٹری کی ملاقات، دو طرفہ تعلقات پر گفتگو

لندن: (دنیا نیوز) پاکستان کے نائب وزیراعظم اور وزیر خارجہ سینیٹر محمد اسحاق ڈار نے برطانیہ کے پارلیمانی انڈر سیکرٹری برائے مشرق وسطیٰ، افغانستان اور پاکستان ہمیش فالکنر سے فارن، کامن ویلتھ اینڈ ڈویلپمنٹ آفس لندن میں ملاقات کی۔

ملاقات کے دوران دوطرفہ تعلقات کے مکمل دائرہ کار کا جائزہ لیا گیا، سیاسی، اقتصادی، ماحولیات اور عوامی روابط کو گہرا کرنے کے لیے اپنے مشترکہ عزم کا اعادہ کیا، علاقائی اور عالمی امور پر بھی تبادلہ خیال کیا گیا۔

نائب وزیراعظم و وزیر خارجہ اسحاق ڈار نے اقتصادی اصلاحات کے لیے پاکستان کے عزم کو اجاگر کیا اور جنوبی ایشیا میں امن و استحکام سمیت علاقائی پیشرفت کے بارے میں پاکستان کے نقطہ نظر کا اظہار کیا۔

انہوں نے اقوام متحدہ کی سلامتی کونسل کی متعلقہ قراردادوں کے مطابق جموں و کشمیر تنازع کے منصفانہ اور پُرامن حل کی اہمیت پر زور دیا۔

دونوں رہنماؤں نے پاکستان اور برطانیہ کے مابین مثبت تعلقات کو سراہا اور باہمی دلچسپی کے شعبوں میں جاری تعاون پر اطمینان کا اظہار کیا۔

انہوں نے موجودہ تعلقات کو مزید متحرک کرنے اور سٹریٹجک تعاون کے لیے نئی راہیں تلاش کرنے کے لیے باقاعدہ اعلیٰ سطح روابط کو برقرار رکھنے کی اہمیت پر بھی زور دیا۔