اسلام آباد: (دنیا نیوز) نائب وزیراعظم اور وزیر خارجہ اسحاق ڈار ایک روزہ دورے پر کابل پہنچ گئے۔
ترجمان دفتر خارجہ کے مطابق وزیر خارجہ اسحاق ڈار پاک چین افغانستان چھٹے سہ فریقی مذاکرات میں شرکت کریں گے، نمائندہ خصوصی افغانستان محمد صادق بھی وزیر خارجہ کے ہمراہ ہوں گے، وزارت خارجہ کے اعلیٰ حکام بھی وفد میں شامل ہیں۔
دفترخارجہ کے مطابق انسداد دہشت گردی، تجارت اور دیگر امور پر تعاون بڑھانے پر تینوں ممالک کے درمیان بات چیت ہو گی۔
ترجمان کا کہنا ہے کہ وزیر خارجہ اسحاق ڈار قائم مقام افغان وزیر خارجہ سے بھی ملاقات کریں گے، ملاقات میں دو طرفہ تعلقات پر گفتگو ہو گی۔
یاد رہے کہ پاکستان، افغانستان اور چین کا دوسرا سہ فریقی اجلاس آج کابل میں ہوگا، افغانستان پہلی بار کابل میں سہ فریقی اجلاس کی میزبانی کر رہا ہے اور اس نے چین اور پاکستان کے وزرائے خارجہ کو افغانستان کے اقتصادی اور سلامتی کے مستقبل پر بات چیت کیلئے مدعو کیا ہے۔
اجلاس میں افغانستان کے امن، سلامتی اور ترقی سے متعلق تمام امور اور موضوعات زیر بحث آئیں گے۔
کابل مذاکرات میں پاکستان، چین اور افغانستان کے درمیان طے پانے والے اہم نکات پر پیش رفت پر تبادلہ خیال کیا جائے گا، چین پاکستان اقتصادی راہداری (CPEC) کی توسیع، امن، سلامتی اور ترقی سے متعلق امور زیر بحث آئیں گے، افغان سرزمین پر سرگرم دہشت گرد تنظیموں کا معاملہ بھی زیر بحث آئے گا۔
بعد ازاں آج (20 اگست) کی شام کو چینی وزیر خارجہ کابل سے اسلام آباد جائیں گے جہاں وہ 21 اگست کو اسلام آباد میں ہونے والے سالانہ پاک چین سٹریٹجک ڈائیلاگ میں شرکت کریں گے۔
یاد رہے کہ تینوں وزرائے خارجہ کے درمیان آخری سہ فریقی اجلاس رواں سال 21 مئی کو بیجنگ میں ہوا تھا۔
