پشاور: (دنیا نیوز) صوبائی کابینہ نے سیلاب متاثرین کی امداد کیلئے بڑا فیصلہ کر لیا، جاں بحق افراد کے لواحقین کو 20 لاکھ اور زخمیوں کو 5 لاکھ روپے امداد دی جائے گی۔
پی ڈی ایم اے متاثرہ خاندانوں کو ’’فوڈ اسٹامپ‘‘ اسکیم کے تحت 15 ہزار روپے فراہم کرے گا، کابینہ نے پی ڈی ایم اے کو ابتدائی طور پر ایک ارب روپے جاری کرنے کی منظوری دے دی۔
کابینہ نے پولیس شہداء کے لواحقین اور زخمی اہلکاروں کیلئے 18 کروڑ 3 لاکھ روپے کے خصوصی پیکیج کی منظوری دی، مہمند میں باجوڑ ایئر ریلیف آپریشن کے دوران ہیلی کاپٹر حادثے میں شہید عملے کے لئے خصوصی شہداء پیکیج کی منظوری دی گئی۔
ربیع الاول کے بابرکت مہینے کے موقع پر صوبے بھر میں سیرت کانفرنسز کے انعقاد کیلئے 6 کروڑ 23 لاکھ روپے گرانٹ منظور، کابینہ نے پشاور ہائی کورٹ کو ریلیز پالیسی سے استثنیٰ دینے اور ایس اے پی سسٹم تک مکمل رسائی کی منظوری دی۔
کابینہ نے سابق ایم پی اے شوکت یوسفزئی کے علاج معالجے کیلئے 2 کروڑ روپے مالی معاونت اور تحصیل برنگ، ضلع باجوڑ میں ریسکیو 1122 سٹیشن کے قیام کیلئے دو کنال اراضی منتقل کرنے کی منظوری دی۔
ضلع دیر لوئر میں کمبر بائی پاس روڈ (4.5 کلومیٹر) کی تعمیر کیلئے 1380.825 ملین روپے کے منصوبے کی منظوری، خیبر پختونخوا رائٹ ٹو پبلک سروس ایکٹ 2014 میں ترامیم کی منظوری دی گئی۔
صوبائی کابینہ نے رائٹ ٹو پبلک سروس کمیشن کیلئے چیف کمشنر کی تقرری اور ورکرز ویلفیئر بورڈ کیلئے دو اراکین کی نامزدگی کی منظوری دے دی۔
خیبرپختونخوا کابینہ نے مختلف ترقیاتی سکیموں و متاثرہ انفراسٹرکچر کی بحالی کی ضرورت کو دیکھتے ہوئے 20 ارب روپے کے ضمنی گرانٹ کی منظوری دے دی۔
یہ فنڈز صوبے میں تیز رفتاری سے جاری اور تکمیل کے قریب منصوبوں پر خرچ کئے جائیں گے تاکہ بروقت تکمیل کو یقینی بنایا جا سکے۔
صوبائی کابینہ نے مالیاتی نظم و نسق کو بہتر اور وسائل کے مؤثر استعمال کے لئے انٹرا سیکٹورل ری اپروپریشن کی بھی منظوری دی۔
