اسلام آباد: (ویب ڈیسک) وزیر اعظم محمد شہباز شریف نے بارشوں کے 2 نئے سپیل کے پیش نظر امدادی سرگرمیاں تیز کرنے کی ہدایت کر دی۔
شہباز شریف نے غذر میں گلوف کے باعث سیلابی صورتحال بننے پر خصوصی احکامات جاری کئے اور رہائشیوں کو محفوظ مقامات پر منتقل کرنے پر ریسکیو ٹیموں اور مقامی رضاکاروں کی پذیرائی کی۔
وزیراعظم نے نیشنل ڈیزاسٹر مینجمنٹ اتھارٹی اور ضلعی انتظامیہ کو متاثرہ علاقوں میں ریسکیو آپریشن جاری رکھنے کی ہدایت کر دی جبکہ بارشوں کے 2 نئے سلسلوں کے پیش نظر امدادی سرگرمیاں تیز کرنے کی ہدایت بھی کر دی۔
شہباز شریف نے ہدایت کی کہ زیریں علاقوں میں سیلاب سے نمٹنے کے لیے مکمل تیاریاں رکھی جائیں جبکہ ندی نالوں اور قدرتی آبی گزرگاہوں کے گرد تعمیرات روکنے کے لیے قومی مہم چلائی جائے گی۔
شہباز شریف کا کہنا تھا کہ حالیہ بارشوں اور سیلاب سے متاثرہ لوگوں کی مدد قومی فریضہ ہے، متاثرین کی ریسکیو اور امداد کے بعد ان کی بحالی کا کام شروع کیا جائے گا اور تمام متاثرین تک طبی امداد اور امدادی سامان کی فراہمی کو ہر حال میں یقینی بنایا جائے۔
وزیر اعظم نے این ڈی ایم اے کو ہدایت کی کہ سیلابی خطرات کے پیش نظر صوبائی اداروں سے رابطہ رکھا جائے۔
شہباز شریف نے گلوف کی قبل از وقت اطلاع دینے پر گلگت بلتستان کے علاقے غذر کے رہائشی وصیت خان کو خراج تحسین پیش کرتے ہوئے کہا کہ وصیت خان نے گلوف کا خطرہ بھانپ کر گاؤں والوں کو بروقت خبردار کیا اور جانی نقصان سے بچاؤ ممکن ہوا۔
