کوئٹہ: (دنیا نیوز) حکومت بلوچستان نے بینک آف بلوچستان کے قیام کا اعلان کر دیا ہے۔
وزیر اعلیٰ بلوچستان کی زیر صدارت اجلاس میں منصوبے کی ابتدائی فیزیبلٹی رپورٹ پیش کی گئی، میر سرفراز بگٹی نے ایک ہفتے کے اندر اس منصوبے کا آپریشنل پلان مرتب کرنے کی ہدایت کی۔
اجلاس سے خطاب کرتے ہوئے وزیراعلیٰ بلوچستان سرفراز بگٹی نے کہا کہ بینک آف بلوچستان کے قیام سے عوام، تاجروں اور سرمایہ کاروں کو معیاری بینکنگ سہولیات فراہم ہوں گی، صوبے کے عوام جلد خوشخبری سنیں گے کیونکہ یہ منصوبہ صوبے میں معاشی سرگرمیوں کے فروغ کا باعث بنے گا۔
ان کا کہنا تھا کہ بینک آف بلوچستان صوبے کی معیشت میں ایک تاریخی سنگِ میل ثابت ہوگا، اس بینک کے ذریعے صوبے کے نوجوانوں کیلئے روزگار کے نئے مواقع پیدا ہوں گے جبکہ صوبائی وسائل کو بروئے کار لا کر ترقیاتی منصوبوں کی رفتار بھی تیز کی جائے گی۔
اجلاس میں صوبائی وزیر خزانہ میر شعیب نوشیروانی، چیف سیکرٹری بلوچستان شکیل قادر خان، پرنسپل سیکرٹری بابر خان سمیت دیگر اعلیٰ حکام نے شرکت کی، جبکہ بینکنگ سیکٹر کے ماہرین نے آن لائن شرکت کرتے ہوئے اس منصوبے کو جلد فعال بنانے پر اتفاق کیا۔
