اسلام آباد:(دنیا نیوز) پاکستان تحریک انصاف کے چیئرمین بیرسٹر گوہر نے دعویٰ کرتے ہوئے کہا ہے کہ جیل میں عمران خان کو تمام سہولیات فراہم کی جارہی ہیں۔
وفاقی دارالحکومت میں میڈیا سے گفتگو کرتے ہوئے بیرسٹر گوہر کا کہنا تھا کہ مجھے بہت خوشی ہوئی ہے، آج تین ماہ کے بعد میں نے بانی پی ٹی آئی سے ملاقات کی۔
انہوں نے کہا کہ بہت اچھا لگا یہ ملاقاتیں جاری رہنی چاہئیں، ملاقاتوں پر پابندی نہیں ہونی چاہیے، اچھی باتیں کی جانی چاہئیں، میں ہمیشہ مفاہمت کی کوشش کرتا ہوں۔
چیئرمین پاکستان تحریک انصاف کا کہنا تھا کہ اگلے ماہ ستمبر سے ہم عدلیہ کی آزادی، جمہوریت کی بحالی اور بانی پی ٹی آئی کی رہائی کے لیے بہت بڑا جلسہ کرنے جا رہے ہیں۔
بیرسٹر گوہر نے کہا کہ جیل میں بانی پی ٹی آئی کو تمام سہولیات مل رہی ہیں، انہیں اخبار بھی اب مہیا کیے جا رہے ہیں، آج کی ملاقات میں ملکی اور پارٹی امور سمیت کے پی کے میں سیلاب کی صورتحال پر گفتگو ہوئی ہے۔
ان کا کہنا تھا کہ بانی پی ٹی آئی نے کے پی کے میں طوفانی بارشوں سے ہونے والی تباہی پر دکھ اور افسوس کا اظہار کیا انہوں نے صوبے میں متاثرین کی بحالی کے لیے بھرپور امدادی کارروائیوں کی ہدایت کی ہے۔
ایک اور سوال کے جواب میں چیئرمین پی ٹی آئی کا کہنا تھا کہ سلمان اکرم راجہ نے استعفی دیا ہی نہیں تھا، استعفیٰ زبانی تھا، لہٰذا منظور یا مسترد ہونے کا معاملہ سامنے نہیں آیا۔
