راولپنڈی: (دنیا نیوز) بانی پی ٹی آئی عمران خان کی بہن علیمہ خان نے کہا ہے کہ سلمان اکرم راجہ سے میری کوئی تلخ کلامی نہیں ہوئی، وہ ہمارے وکیل ہیں اور ہماری فیملی کی طرح ہیں۔
اڈیالہ جیل کے باہر میڈیا سے گفتگو کرتے ہوئے علیمہ خان کا کہنا تھا کہ سلمان اکرم راجہ کا اپنا کوئی مسئلہ ہوگا، ضمنی انتخابات کا ایشو ہے، میرا خیال ہے ان سے ہی پوچھیں۔
انہوں نے کہا کہ بانی پی ٹی آئی کی ضمانت ہوئی، سمجھ نہیں آئی میرے بچوں کو کیوں اٹھایا، شاہ ریز خان بزنس کرتا ہے، سپورٹس میں پاکستان کی نمائندگی کی ہے شیر شاہ کو بھی دوسرے دن اٹھایا، ان گرفتاریوں سے ہمیں کوئی فرق نہیں پڑتا۔
ان کا کہنا تھا کہ میں نے کہا ہے مجھے بھی گرفتار کریں، یہ خوفزدہ ہیں بچوں سے ڈر گئے ہیں، بانی کا پیغام اگر فیملی کے ذریعے دیا جاتا ہے تو وہ بانی کا مؤقف ہوتا ہے۔
اس موقع پر گفتگو کرتے ہوئے عظمیٰ خان نے کہا کہ ضمنی انتخاب پر تنازع ہے تو پارٹی بتائے گی، ہماری جب ملاقات ہوئی تو بانی نے واضح طور پر بتایا تھا ضمنی الیکشن نہیں لڑنا، بانی نے کہا تھا الیکشن میں جانے سے پارٹی کو نقصان ہوگا اس کا کوئی فائدہ نہیں، الیکشن میں جانے سے ناجائز نااہلیوں کو جواز مل جائے گا۔
عظمیٰ خان کا کہنا تھا کہ بانی نے کہا تھا یہ ہمیں جیتنے نہیں دیں گے مرضی کے لوگوں کو جتائیں گے، اگر ہم الیکشن میں جائیں گے تو پارٹی ان نااہلیوں کو جائز قرار دے گی، بانی نے پارٹی کو پیغام دیا تھا تحریک پر توجہ مرکوز کریں۔
