لاہور: (دنیا نیوز) صوبائی وزیر اقلیتی امور سردار رمیش سنگھ اروڑہ نے کہا ہے کہ سکھ کمیونٹی کے جذبات کو ٹھیس پہنچانے کی بھارتی کوشش ناکام ہو گئی، گوردوراہ کرتار پور صاحب سے سو کے قریب یاتری اور مقامی افراد محفوظ مقامات پر منتقل کر دیے گئے۔
رمیش سنگھ اروڑہ نے کہا کہ پاک فوج اور ریسکیو اہلکاروں کی دن رات کی کاوشیں رنگ لے آئیں، گوردوارہ کرتارپور صاحب میں تاریخی گرنتھ اور قیمتی اشیاء محفوظ ہیں، فیلڈ مارشل عاصم منیر کو خراجِ تحسین پیش کرتا ہوں۔
انہوں نے کہا کہ پاک فوج کے جوانوں، ضلعی انتظامیہ اور دیگر محکموں نے ریسکیو آپریشن کامیاب بنایا، بھارتی حکومت کی آبی جارحیت نے پاکستان کے کئی علاقوں کو ڈبو دیا، بھارت کی طرف سے پانی چھوڑنا کھلی آبی دہشتگردی ہے۔
سردار رمیش سنگھ نے بتایا کہ گوردوارہ کرتارپور صاحب میں دس فٹ کے قریب پانی کھڑا ہے، مودی سرکار نے جان بوجھ کر اڑھائی لاکھ کیوسک کا ریلا بھیجا۔
انہوں نے کہا کہ وزیراعلیٰ پنجاب کی خصوصی ہدایات پر پہلے سے حفاظتی انتظامات یقینی بنائے گئے ، چند دنوں میں گوردوارہ کرتارپور صاحب کو دوبارہ یاتریوں کے لیے کھول دیا جائے گا، دنیا بھر کی سکھ کمیونٹی کو مایوس نہیں کریں گے۔
انہوں نے یہ بھی کہا کہ حکومت پنجاب سکھ برادری کے ساتھ مکمل یکجہتی کا اظہار کرتی ہے، جلد کرتارپور میں معمول کی سرگرمیاں بحال ہوں گی۔
