لاہور:(دنیا نیوز) وزیر اطلاعات پنجاب عظمی بخاری نے بیرسٹر گوہر کے بیان پر ردعمل دیتے ہوئے کہا کہ مسلم لیگ ن ملک کا سوچتی ہے، آپ اپنی دکانداری کا سوچتے ہیں۔
لاہور سے جاری اپنے ایک بیان میں عظمیٰ بخاری کا کہنا تھا کہ سیلاب اور بارشوں سے ملکی صورتحال تشویشناک ہے، ایسے موقع پر بھی آپ جیسی چھوٹی ذہنیت والے لوگوں کو اپنی سیاست کی فکر پڑی ہے، آپ کے اپنے شہر بونیر میں 200 سے زیادہ لوگ جاں بحق ہو گئے۔
وزیر اطلاعات نے کہا کہ خیبر پختونخواہ حکومت نے کتنے لوگوں کو ریسکیو کیا اور ریلیف دیا، ابھی تک آپ قوم کو یہ نہیں بتا سکتے، مریم نواز نے 10 لاکھ شہریوں اور 7 لاکھ مویشیوں کی جانیں بچائی ہیں، وزیراعلیٰ پنجاب تمام سیلاب متاثرین کو عارضی رہائش اور کھانا فراہم کر رہی ہیں۔
عظمیٰ بخاری کا کہنا تھا کہ مریم نواز سیلاب متاثرین کے مویشیوں کو بھی چارہ بھی فراہم کر رہی ہیں،آپ لوگوں کو اپنے لیڈر کی طرح ہر قومی سانحے پر پوائنٹ سکورنگ کرنے کی گندی عادت ہے، مسلم لیگ ن ملک کا سوچتی ہے آپ اپنی دکانداری کا سوچتے ہیں۔
