اسلام آباد:(دنیا نیوز) قومی اسمبلی میں حضور اکرم ﷺ کی ولادت باسعادت کے 1500 سال کی آمد پر تصویری نمائش کا انعقاد کیا گیا۔
سپیکر سردار ایاز صادق نے پارلیمنٹ ہاؤس میں روح پرور تصویری نمائش کا افتتاح کیا، انہیں معروف خطاط واصل شاہد نے نمائش میں رکھے گئے فن پاروں سے متعلق تفصیلی بریفنگ دی۔
تقریب میں ڈپٹی سپیکر غلام مصطفیٰ شاہ، ممبر قومی اسمبلی اعجاز جاکھرانی اور سید حفیظ الدین شریک ہوئے جب کہ مختلف مکاتب فکر کے افراد اور قومی اسمبلی سیکرٹریٹ کے افسران کی بڑی تعداد نے بھی شرکت کی۔
سردار ایاز صادق کا کہنا تھا کہ حضرت محمد ﷺ کی ذات اقدس پوری انسانیت کے لیے رحمت اور ہدایت کا سرچشمہ ہیں، سیرت النبی ﷺ کی ذات اقدس پر مبنی تقریبات ایمان کو تازگی بخشتی ہیں۔
انہوں نے کہا کہ سیرت النبی ﷺ سے متعلق تصاویری نمائش نوجوان نسل کے لیے مشعلِ راہ ہے، روحانی اور فکری سرگرمیاں امتِ مسلمہ کی یکجہتی و اخوت کو مضبوط کرتی ہیں۔
علاوہ ازیں شرکائے تقریب نے تصویری نمائش کو نبی کریم ﷺ کی حیات طیبہ کے پہلوؤں کو اُجاگر کرنے کی بہترین کاوش قرار دیا، انہوں نے منتظمین کی کاوشوں کو خراجِ تحسین پیش کیا۔
