اسلام آباد:(دنیا نیوز) جڑواں شہروں میں ڈینگی وائرس کے بڑھتے کیسز کے پیش نظر ڈسٹرکٹ ہیلتھ آفس نے الرٹ جاری کردیا ہے، شہریوں کو احتیاطی تدابیر اپنانے کی ہدایت کی گئی ہے۔
ترجمان ڈی ایچ او کے مطابق وفاقی دارالحکومت اسلام آباد میں حالیہ دنوں میں ڈینگی وائرس کے 122 کیسز رپورٹ ہوئے ہیں، ڈینگی مریضوں کی اکثریت نے حالیہ دنوں مری کا سفر کیا تھا۔
انہوں نے بتایا کہ حالیہ بارشوں کے باعث پانی جمع ہونے سے ڈینگی کیسز میں اضافہ ہوا ہے، شہریوں کو ہدایت کی گئی ہے کہ وہ گھروں کے اردگرد پانی جمع نہ ہونے دیں۔ گملوں، ٹینکیوں اور برتنوں کو ڈھانپ کر رکھیں۔
ترجمان کا مزید کہنا تھا کہ ڈینگی سے بچاؤ کیلئے مچھردانی اور مچھر بھگانے والا لوشن استعمال کرنا بھی ضروری ہے۔
