پشاور: (دنیا نیوز) خیبر پختونخوا کے 4 اضلاع کی 5 ویلیج کونسلز چیئرمین نشستوں پر ان ہاؤس پولنگ کا شیڈول جاری کر دیا گیا، پولنگ 11 ستمبر کو اوپن ڈویژن کے تحت منعقد ہو گی۔
الیکشن کمیشن کے مطابق پولنگ مردان، ہنگو، اورکزئی اور ٹانک کے اضلاع میں ہوگی، متعلقہ ویلیج کونسل کے ممبران اپنا حق رائے دہی استعمال کریں گے، پولنگ کے لیے ریٹرننگ افسران کی تقرری کر دی گئی ہے۔
الیکشن کمیشن کی جانب سے کہا گیا ہے کہ ریٹرننگ آفیسر اسی روز کاغذات نامزدگی وصول کریں گے اور جانچ پڑتال بھی اسی دن ہوگی، امیدوار اسی روز کاغذات نامزدگی واپس لینے کے اہل ہوں گے، کوئی ممبر صرف ایک امیدوار کا تجویز کنندہ یا تائید کنندہ بن سکے گا۔
پولنگ کا طریقہ کار
پولنگ اوپن ڈویژن کے اصول کے تحت ہوگی، امیدوار اپنے پسندیدہ امیدوار کا نام متعلقہ رجسٹر میں درج کر کے دستخط اور انگوٹھے کا نشان لگائیں گے، ریٹرننگ آفیسر نتیجہ تیار کر کے فوری طور پر صوبائی الیکشن کمشنر کو ارسال کرے گا۔
