اسلام آباد: (ویب ڈیسک) چیئرمین سینیٹ سید یوسف رضا گیلانی نے قطر کے دارالحکومت دوحہ پر اسرائیلی فضائی حملے کی شدید مذمت کرتے ہوئے اسے خطے میں امن و استحکام کو سبوتاژ کرنے کی سنگین جارحیت قرار دیا ہے۔
چیئرمین سینیٹ یوسف رضا گیلانی نے کہا کہ یہ بزدلانہ اور کھلی جارحیت ناصرف قطر کی خودمختاری کے خلاف ہے بلکہ اقوام متحدہ کے چارٹر کی کھلی خلاف ورزی بھی ہے، بالخصوص آرٹیکل 2(4) کی جو کسی ریاست کی علاقائی سالمیت یا سیاسی خودمختاری کے خلاف طاقت کے استعمال یا اس کی دھمکی کو ممنوع قرار دیتا ہے۔
یوسف رضا گیلانی نے کہا کہ دوحہ پر حملہ قطر کی خودمختاری پر حملہ ہونے کے ساتھ ساتھ خلیجی خطے کو غیر مستحکم کرنے اور عالمی امن کو خطرے میں ڈالنے کی ایک خطرناک کوشش ہے۔
چیئرمین سینیٹ کا کہنا تھا کہ اسرائیل کے یہ معاندانہ اقدامات ایک بار پھر اس کی بین الاقوامی قوانین اور انسانی اصولوں سے بے حسی اور بے اعتنائی کو بے نقاب کرتے ہیں، انہوں نے اس امر پر زور دیا کہ مسلم ممالک کو متحد ہو کر اسرائیلی جارحیت کا مقابلہ کرنے کے ئیے ایک جامع اور مؤثر حکمت عملی اختیار کرنا ہوگی تاکہ مسلم امہ کے اجتماعی مفادات کا تحفظ یقینی بنایا جا سکے۔
ان کا مزید کہنا تھا کہ اسرائیل کی خلاف ورزیاں صرف فلسطین تک محدود نہیں رہیں جہاں وہ معصوم شہریوں پر سنگین انسانی حقوق کی پامالیاں کر رہا ہے بلکہ اب یہ خطرات پورے خطے تک پھیلتے جا رہے ہیں جو عالمی استحکام کے لیے ایک بڑا خطرہ ہے۔
چیئرمین سینیٹ نے عالمی برادری بالخصوص اقوام متحدہ اور سلامتی کونسل سے مطالبہ کیا کہ وہ فوری طور پر اسرائیل کی ان جارحانہ کارروائیوں کا نوٹس لے اور عملی اقدامات کرے تاکہ مزید تباہی کو روکا جا سکے۔
