کراچی: (دنیا نیوز) گورنر سندھ کامران خان ٹیسوری نے چین کے دورے پر موجود ایم کیو ایم پاکستان کے چیئرمین ڈاکٹر خالد مقبول صدیقی سے ٹیلی فونک رابطہ کیا۔
ٹیلیفونک گفتگو کے دوران کراچی میں حالیہ بارشوں کے بعد پیدا ہونے والی سیلابی صورتحال پر گہری تشویش کا اظہار کیا۔
گورنر سندھ نے کہا کہ موجودہ صورتحال انتہائی سنگین ہے اور تمام منتخب اراکین اسمبلی کو ہدایت جاری کی گئی ہے کہ وہ اپنے اپنے حلقوں میں موجود رہیں اور عوام کی ہر ممکن مدد کریں، انہوں نے واضح کیا کہ مشکل کی اس گھڑی میں کسی کو تنہا نہیں چھوڑا جائے گا۔
کامران ٹیسوری نے متعلقہ حکام کو متاثرہ علاقوں میں امدادی سرگرمیاں تیز کرنے، لوگوں کو محفوظ مقامات پر منتقل کرنے، راشن، پینے کے پانی اور دیگر ضروری اشیاء کی فوری فراہمی یقینی بنانے کی ہدایات بھی جاری کیں۔
گورنر سندھ کا کہنا تھا کہ حکومت عوام کے ساتھ کھڑی ہے اور ہر ممکن اقدام کیا جائے گا تاکہ شہریوں کو ریلیف فراہم کیا جا سکے۔
