کراچی: (دنیا نیوز) وزیر اطلاعات سندھ شرجیل انعام میمن نے کہا ہے کہ حکومت سندھ مکمل الرٹ ہے، مزید بارشیں نہ ہوئیں تو صورتحال کچھ ہی گھنٹوں میں معمول پر آجائے گی۔
ایک بیان میں شرجیل میمن کا کہنا تھا کہ حالیہ بارشوں اور دریاؤں میں بڑھتے ہوئے پانی کے پیش نظر بڑے پیمانے پر ریسکیو اور ریلیف آپریشنز جاری ہیں، کراچی میں بارشوں کے بعد پیدا ہونے والی صورتحال بتدریج بہتری کی طرف جا رہی ہے، ڈیم بھرنے اور شدید بارشوں کی وجہ سے لیاری ندی اور ملیر ندی میں طغیانی آئی۔
انہوں نے کہا کہ سمندر میں اونچی لہروں کی وجہ سے بھی بارش کے پانی کے اخراج میں تاخیر ہوئی، شدید بارشوں کی وجہ سے کچھ نشیبی علاقوں میں شہریوں کو مشکلات کا سامنا کرنا پڑا، 24 سے 48 گھنٹوں میں بارش کا نیا سپیل آنے کی پیش گوئی کی گئی ہے، حکومت سندھ مکمل الرٹ ہے، مزید بارشیں نہ ہوئیں تو صورتحال کچھ ہی گھنٹوں میں معمول پر آجائے گی۔
ان کا کہنا تھا کہ میئر کراچی مرتضیٰ وہاب کی سربراہی میں کراچی کی شہری حکومت اور پی ڈی ایم اے سمیت تمام متعلقہ ادارے متحرک ہیں۔
وزیر اطلاعات سندھ نے کہا کہ سیلاب سے ممکنہ متاثر ہونے والے کچہ کے علاقہ سے گزشتہ 24 گھنٹوں کے دوران 4881 افراد کو محفوظ مقامات پر منتقل ہو چکے ہیں، اب تک مجموعی طور پر 146,492 افراد محفوظ مقامات پر منتقل ہوچکے ہیں۔
شرجیل انعام میمن کا کہنا تھا کہ حکومت سندھ کے قائم 163 فکسڈ اور موبائل ہیلتھ سینٹرز کے ذریعے پچھلے 24 گھنٹوں میں 5,296 افراد کو طبی سہولیات فراہم کی گئیں، مجموعی طور پر 55,336 افراد کو طبی امداد دی جا چکی ہے۔
انہوں نے مزید بتایا کہ پچھلے 24 گھنٹوں میں 11,078 مویشیوں کو بھی محفوظ مقامات پر منتقل کیا گیا ہے، اب تک کل 400,018 مویشی محفوظ مقامات پر منتقل کئے جا چکے ہیں، 58,166 مویشیوں کو گزشتہ 24 گھنٹوں کے دوران ویکسین اور علاج دیا گیا، اب تک مجموعی طور پر 1032991 مویشیوں کی ویکسینیشن اور علاج مکمل کیا جا چکا ہے۔
