نیویارک: (دنیا نیوز) نائب وزیراعظم و وزیر خارجہ اسحاق ڈار نے کہا ہے کہ عالمی مالیاتی نظام نے عدم مساوات کو بڑھا دیا۔
اقوام متحدہ میں پائیدار، شمولیتی اور مستحکم معیشت پر اجلاس ہوا، اسحاق ڈار نے عالمی معیشت پر پہلی دو سالہ سربراہی کانفرنس میں شرکت کی۔
ترجمان دفتر خارجہ کے مطابق نائب وزیراعظم اسحاق ڈار نے موجودہ عالمی مالیاتی ڈھانچے پر تنقید کی، وزیر خارجہ نے ترقی پذیر ممالک پر قرضوں کے بوجھ کی نشاندہی کی۔
اسحاق ڈار نے پائیدار ترقی اہداف کے مالیاتی خلا پر تشویش کا اظہار کیا، ماحولیاتی بحران کے تیز رفتار بڑھنے کی طرف توجہ مبذول کرائی گئی۔
ترجمان دفتر خارجہ کے مطابق اسحاق ڈار نے قرضوں کے بحران کے حل کے لیے فیصلہ کن اصلاحات کی ضرورت پر زور دیا۔
نائب وزیراعظم اسحاق ڈار نے ترقی اور ماحولیاتی فنانسنگ میں بڑے اضافے کا مطالبہ کیا، اسحاق ڈار نے جامع اور منصفانہ عالمی معاشی نظام کی تشکیل پر زور دیا۔
امریکی صدر ڈونلڈ ٹرمپ سے پاکستان کے وزیراعظم شہباز شریف کی ملاقات بارے سوال کے جواب میں اسحاق ڈار نے کہا کہ جی بالکل ملاقات طے ہے، وقت کنفرم ہونے پر بتادیں گے۔
