اسلام آباد: (دنیا نیوز) صدر مملکت آصف علی زرداری نے کہا ہے کہ پاکستان عالمی بحری برادری کا ذمہ دار رکن بن کر ابھر رہا ہے۔
عالمی یومِ بحری تجارت 2025 کے موقع پر اپنے خصوصی پیغام میں صدر مملکت کا کہنا تھا کہ پاکستان کا بحری شعبہ قومی تجارت اور معاشی استحکام کی ریڑھ کی ہڈی کی حیثیت رکھتا ہے، پاکستان کا بحری مستقبل روشن اور پائیدار ہے، بندرگاہوں کی ترقی، ڈیجیٹائزیشن اور جدت کاری حکومت کی ترجیح ہے۔
انہوں نے کہا کراچی اور پورٹ قاسم کی اپ گریڈیشن جاری ہے، اور انہیں علاقائی تجارتی مراکز میں بدلنے کیلئے حکومت پرعزم ہے، بحری پالیسیوں میں بھی اصلاحات جاری ہیں اور قومی شپنگ کو عالمی سطح پر مسابقتی بنایا جا رہا ہے۔
ان کا کہنا تھا کہ پاکستانی شپنگ کمپنیوں کے لئے مراعات، غیر ملکی انحصار میں کمی کا باعث بنیں گی، فریٹ سکیورٹی میں بہتری اور زرِ مبادلہ کی بچت کے لئے اہم اقدامات جاری ہیں، پاکستان سنگل ونڈو کے تحت پورٹ کمیونٹی سسٹم کا مرحلہ وار نفاذ جاری ہے۔
صدر مملکت نے کہا کہ بندرگاہی آپریشنز کی ڈیجیٹائزیشن سے پورا سپلائی چین مربوط ہوگا، عالمی معیار کے مطابق اصلاحات قومی مفادات اور علاقائی انضمام کیلئے ضروری ہیں، پاکستان عالمی بحری برادری کا ذمہ دار رکن بن کر ابھر رہا ہے، بحری شعبے میں یکجہتی اور اعلیٰ کارکردگی کے ذریعے پائیدار ترقی کا عزم رکھتے ہیں، بہتر پالیسیوں اور محنت سے مضبوط بحری مستقبل کی تعمیر ممکن ہے۔
آصف زرداری کا کہنا تھا کہ پاکستان کو بین الاقوامی سطح پر باوقار، پائیدار اور جدید بحری قوم بنایا جائے گا، بحری شعبے میں سرمایہ کاری سے تجارتی حجم میں اضافہ، روزگار کے مواقع میسر آئیں گے، بندرگاہوں کی جدت کاری پاکستان کو علاقائی ٹریڈ گیٹ وے میں تبدیل کرے گی۔
انہوں نے مزید کہا کہ پاکستان عالمی تجارتی سپلائی چین کا کلیدی حصہ بننے کیلئے تیار ہے، بحری شعبے میں تمام سٹیک ہولڈرز کو ساتھ لے کر چلیں گے، کیوں کہ بحری ترقی، قومی ترقی کا ضامن ہے۔
