اسلام آباد: (دنیا نیوز) 4 نومنتخب سفیروں نے ایوانِ صدر میں صدرِ مملکت آصف علی زرداری کو اپنی اسنادِ سفارت پیش کیں۔
صدر مملکت کو کینیڈا کے ہائی کمشنر طارق علی خان، لبنان کے سفیر عبدالعزیز عیسیٰ، نیدرلینڈز کے سفیر رابرٹ یان سیگرٹ اور نیوزی لینڈ کے ہائی کمشنر ڈیوڈ پائن نے اپنی اسناد پیش کیں۔
ایوانِ صدر پہنچنے پر سفیروں کو پاک فوج کے دستے نے گارڈ آف آنر پیش کیا، صدر آصف علی زرداری نے نومنتخب سفیروں کو عہدہ سنبھالنے پر مبارکباد دی۔
صدر آصف علی زرداری نے کہا کہ پاکستان اور کینیڈا کے تعلقات دیرینہ، دوستانہ اور خوشگوار ہیں، کینیڈا کے ساتھ آئی ٹی، توانائی اور معدنیات کے شعبوں میں تعاون بڑھانے کی ضرورت ہے۔
.jpg)
آصف علی زرداری نے کہا کہ لبنان کے عوام سے مکمل یکجہتی کا اظہار کرتے ہیں اور اسرائیلی جارحیت کی مذمت کرتے ہیں، پاکستان لبنان کی خودمختاری اور علاقائی سالمیت کی حمایت جاری رکھے گا۔
صدر مملکت نے کہا کہ نیدرلینڈز کے ساتھ تجارت، سرمایہ کاری اور تعلیم کے شعبوں میں تعلقات کو مزید فروغ دینے کی ضرورت ہے، نیدرلینڈز کی پاکستان کے ساتھ پانی کے انتظام اور ماحولیاتی استحکام کے منصوبوں میں شراکت قابلِ قدر ہے۔
آصف علی زرداری نے کہا کہ نیوزی لینڈ کے ساتھ زراعت، مویشی پالنے، ماہی گیری اور صاف توانائی میں تعاون کے وسیع امکانات ہیں، انہوں نے چاروں سفیروں کے لیے نیک خواہشات کا اظہار کیا اور کہا سفراء کی خدمات سے تعلقات مزید مضبوط ہوں گے۔
