کراچی: (ویب ڈیسک) پاکستان کے خلاف نازیبا زبان استعمال کرنے والے 2 افغانی نوجوانوں نے اپنے عمل پر شرمندگی کا اظہار کرتے ہوئے معافی مانگ لی۔
کراچی میں مقیم 2 افغانی نوجوانوں کی ویڈیو وائرل ہوئی تھی جس میں وہ افغان مہاجرین کے انخلاء پر پاکستان کے خلاف غلط الفاظ کا استعمال کررہے تھے، ایک ویڈیو میں موجود لڑکے کی شناخت فرہاد کے نام سے ہوئی جو کریانے کی دکان میں کام کرتا تھا، فرہاد کی ویڈیو دو خریداروں نے بنا کر انٹرنیٹ پر شیئر کی تھی۔
فرہاد کی ویڈیو وائرل ہونے کے بعد اب اس کی ایک اور نئی ویڈیو سامنے آئی ہے جس میں وہ روتے ہوئے اپنے بیان پر ندامت کا اظہار کر رہا ہے اور معافی بھی مانگ رہا ہے، نئی ویڈیو میں فرہاد نے کہا کہ اُس سے غلطی ہوئی ہے اور وہ اس پر شرمندہ بھی ہے جبکہ اُس نے پاکستان زندہ باد اور سندھ پولیس زندہ باد کے نعرے بھی لگائے۔
دوسری ویڈیو بھی ایک افغانی نوجوان محب اللہ کی تھی جو ایک چائے کے ہوٹل پر کام کرتا ہے، وائرل ویڈیو میں محب اللّٰہ بھی پاکستان کو برا بھلا کہہ رہا تھا، تاہم اب نئی ویڈیو میں اس کا معافی کا بیان سامنے آیا ہے، نئی ویڈیو میں محب اللہ نے اپنی پرانی وائرل ویڈیو پر معافی مانگتے ہوئے شرمندگی کا اظہار کیا ہے۔
