اسلام آباد:(دنیا نیوز) چیف الیکشن کمشنر سکندر سلطان راجہ نے کہا ہے کہ آج کا ضمنی الیکشن پرامن رہا جس میں ٹرن آؤٹ کم رہنے کی کئی وجوہات ہیں۔
وفاقی دارالحکومت اسلام آباد میں میڈیا سے گفتگو کرتے ہوئے سکندر سلطان راجہ کا کہنا تھا کہ پنجاب اور خیبرپختونخوا کی حکومتوں کا شکرگزار ہوں۔
اُنہوں نے کہا کہ آج کا ضمنی الیکشن بہت پرامن رہا، ضمنی انتخابات میں ہمیشہ ٹرن آؤٹ کم رہتا ہے، کم ٹرن آؤٹ کی بہت سی وجوہات ہوتی ہیں۔
چیف الیکشن کمشنر کا کہنا تھا کہ اس الیکشن میں نمبر گیم کی تبدیلی نہیں ہونی تھی جس کی وجہ سے عوام کی دلچپسپی کم رہی۔
سکندر سلطان راجہ کا کہنا تھا کہ ڈی آر اوز نے کچھ رپورٹس بھیجی ہیں، کچھ شکایات کا کمیشن نے خود نوٹس لیا، آج کے ضمنی انتخابات میں کوئی غیر معمولی شکایات موصول نہیں ہوئیں، طلال چودھری کو کل طلب کیا ہے، سماعت ہوگی۔
اُنہوں نے کہا کہ لوکل گورنمنٹ انتخابات میں ضابطہ اخلاق کی خلاف ورزی پر ایک وزیر اور امیدوار کو نااہل کیا تھا، ہر چیز کی ایک لیگل سکیم ہے، دنیا بھر میں انتخابات میں خلاف ورزیاں ہوتی ہیں۔
چیف الیکشن کمشنر کا مزید کہنا تھا کہ کمیشن وقتاً فوقتاً اپنی تجاویز حکومت کو بھیجتا رہتا ہے، کمیشن کے پاس ٹربیونل کو ہدایات دینے کا کوئی اختیار نہیں۔
