لاہور: (ویب ڈیسک) 12 ویں قومی ویمن فٹبال چیمپئن شپ کا ابتدائی راؤنڈ اگلے ہفتے سے شروع ہو گا۔ ایونٹ میں 24 ٹیمیں ایکشن میں ہونگی، 8 ٹاپ ٹیمیں فائنل راؤنڈ کیلئے کوالیفائی کریں گی۔
پاکستان فٹبال فیڈریشن کے مطابق قومی ویمن فٹبال چیمپئن شپ کے کوالیفائنگ راؤنڈ میں 24 ٹیمیں 7 گروپس میں تقسیم کی گئی ہیں، مقابلے 25 نومبر (بروز پیر) سے 5 دسمبر کے درمیان کراچی، لاہور اور اسلام آباد میں ہوں گے۔
24 ٹیموں کو 7 گروپس میں تقسیم کیا گیا ہے، گروپ تھری میں پانچ ٹیمیں شامل ہیں، گروپ سیون میں چار جبکہ باقی پانچ گروپس میں تین تین ٹیمیں شامل کی گئی ہیں۔
ہر گروپ سے 1.1 جبکہ گروپ تھری سے دو ٹیمیں اگلے ماہ ہونے والے مین راؤنڈ کیلئے کوالیفائی کریں گی۔
گروپ ون میں جافا ویمن فٹبال کلب، کراچی ویمن فٹبال کلب، نسیم حمید ویمن فٹبال کلب، گروپ ٹو میں ویا ویمن فٹبال کلب، بلوچستان، فٹبال اسکول آف ایکسلینس، گروپ تھری میں سی ڈی ایس ایس ویمن کلب، محسن گیلانی ویمن فٹبال کلب، کراچی ککرز ویمن فٹبال کلب، کراچی یونائیٹیڈ ویمن فٹبال کلب اور سندھ کی ٹیمیں شامل ہیں۔
گروپ فور میں واپڈا، سی جے ایم سیالکوٹ، ینگ رائزنگ سٹارز لیہ۔ گروپ فائیو میں پنجاب، ماڈل ٹاؤن ویمن فٹبال کلب، ایچ ای سی، گروپ سکس میں ینگ رائزنگ سٹارز راولپنڈی، اسلام آباد، گلگت بلتستان جبکہ گروپ سیون میں آرمی، فرنٹیئر ویمن فٹبال کلب ، کے پی ٹی اور ہاکس ویمن فٹبال کلب کی ٹیمیں شامل ہیں۔
گروپ ون، ٹو اور تھری کی ٹیمیں کراچی، فور اور فائیو کی ٹیمیں لاہور جبکہ سکس اور سیون کی ٹیمیں اسلام آباد میں میچز کھیلیں گی۔ پہلے راؤنڈ کے اختتام پر دوسرے راؤنڈ کے وینیوز اور ڈراز کا اعلان کیا جائے گا۔
