آکلینڈ : (ویب ڈیسک) سپین نے سویڈن کو 1-2 سے شکست دیکر فیفا ویمنز ورلڈ کپ فٹبال کے فائنل میں کھیلنے کا اعزاز حاصل کرلیا۔
سویڈن پانچویں بار ٹورنامنٹ کے سیمی فائنل میں پہنچی لیکن بدقسمتی نے اس بار بھی اس کا ساتھ نہ چھوڑا اور ایک بار پھرفائنل کی آس لیے ٹورنامنٹ سے باہر ہوگئی۔
ایڈن پارک، آکلینڈ میں کھیلے جانے والے سیمی فائنل میں سویڈن اور سپین کے درمیان سخت مقابلہ ہوا، دونوں ٹیموں نے گول کرنے کی بھرپور کوشش کی لیکن کامیابی نہ ملی اور میچ کا پہلا ہاف بغیر کسی گول کے برابر رہا۔
— FIFA Women s World Cup (@FIFAWWC) August 15, 2023
دوسرے ہاف میں بھی دونوں ٹیموں نے برتری حاصل کرنے کی کوشش جاری رکھی، 81 ویں منٹ میں سپین کی سلمی سیلسٹے نے خوبصورت گول کرکے اپنی ٹیم کو برتری دلا دی۔
7 منٹ بعد سویڈن کی ریبیکا نے گول کرکے اسکور برابر کردیا۔ کھیل کے اختتام سے چند منٹ قبل اسپین کی اولگا کارمونا نے گول کرکے ٹیم کو 1-2 کی فتح دلوا دی۔
— FIFA Women s World Cup (@FIFAWWC) August 15, 2023
دوسرا سیمی فائنل بدھ 16 اگست کو میزبان آسٹریلیا اور انگلینڈ کے درمیان کھیلا جانا ہے، انگلینڈ نے 2015ءکے ورلڈ کپ میں تیسری پوزیشن حاصل کی تھی جبکہ آسٹریلیا نے پہلی بار چیمپئن شپ کے لاسٹ فور میں کھیلنے کا اعزاز حاصل کیا ہے۔
