لاہور: (دنیا نیوز) دنیا کے سب سے بڑے یوتھ فٹبال ناروے کپ 2026 میں پاکستان سے تین ٹیمیں حصہ لیں گی، پاکستان میں ناروے کا سفارت خانہ ان ٹیموں کے کھلاڑیوں اور آفیشلز کے لیے ویزوں کا فیصلہ کرے گا۔
26 جولائی سے 2 اگست تک ناروے کے دارالحکومت اوسلو میں کھیلے جانے والے ناروے کپ میں 30 سے زائد ممالک کی 2 ہزار سے زائد ٹیموں کی شرکت متوقع ہے، ان مقابلوں کے لیے اوسلو کے 90 میدان مختص کیے گئے ہیں۔
سٹریٹ چلڈرنز، اسلام آباد بوائز انڈر 17 اور کراچی سے لیاری فٹبال اکیڈمی بوائز انڈر 15 ایونٹ میں شرکت کے خواہاں ہیں جبکہ 2024 میں بوائز انڈر 15 ایونٹ کی رنراپ ٹیم بیٹر فیوچرپاکستان فٹبال کلب رواں سال سیون اے سائیڈ گرلز انڈر 15 مقابلوں میں بھی شرکت کے لیے تیاریوں میں مصروف ہے۔
سندھ حکومت نے ناروے کپ کے لیے لیاری فٹبال اکیڈمی کو ایک کروڑ 83 لاکھ روپے کا سپانسرشپ کا چیک فراہم کردیا ہے جبکہ لیاری ہی سے تعلق رکھنے والے بیٹر فیوچر پاکستان فٹبال کلب کے ہیڈ کوچ عبدالراشد بلوچ نے بھی کراچی پریس کلب میں منعقدہ پریس کانفرنس میں صوبائی حکومت سے مالی اعانت کی اپیل کی ہے۔
