بیونس آئرس: (ویب ڈیسک) ارجنٹائن فٹبال ایسوسی ایشن (AFA) کے اعلیٰ عہدیدار نے تصدیق کی ہے کہ لیونل میسی 2026 کے فیفا ورلڈ کپ میں ارجنٹینا کی قیادت کریں گے۔
سات ماہ بعد ٹیم میں واپسی کرنے والے لیونل میسی نے چلی اور کولمبیا کے خلاف میچز میں شرکت کی جبکہ کلب لیول پر بھی ان کی شاندار فارم جاری ہے، ورلڈ کپ کی تیاری کے سلسلے میں ارجنٹینا ستمبر میں وینزویلا اور ایکواڈور کے خلاف میچز کھیلے گا۔
دریں اثنا ارجنٹائن فٹبال ایسوسی ایشن نے دبئی میں لولو فنانشل ہولڈنگز کے ساتھ نئی شراکت داری کا اعلان کیا ہے جس کے تحت مشرق وسطیٰ، بھارت اور جنوب مشرقی ایشیا میں مداحوں سے جڑنے کی متعدد سرگرمیاں منعقد کی جائیں گی۔
ارجنٹینا کے کوچ لیونل اسکلونی نے بھی تقریب میں شرکت کی اور مستقبل میں دبئی میں ٹریننگ کے امکان کا اظہار کیا۔
