25 کیرٹ کا محبت نامہ! رونالڈو کی جارجینا کو بالآخر شادی کی پیشکش

ریاض: (ویب ڈیسک) پرتگالی فٹبال لیجنڈ کریسٹیانو رونالڈو اوران کی دیرینہ ساتھی جارجینا روڈریگز 10 سال کے تعلق کے بعد باضابطہ طور پر منگنی کے بندھن میں بندھ گئے، 40 سالہ رونالڈو نے جارجینا کو ایک شاندار ہیرے کی انگوٹھی پہنا کرشادی کی پیشکش کر دی۔

جارجینا نے یہ خوشخبری انسٹاگرام پر شیئر کی جہاں انہوں نے اپنی ایک تصویر پوسٹ کی جس میں ان کا ہاتھ رونالڈو کے ہاتھ پر رکھا ہوا ہے اور بڑی سی ہیرے کی انگوٹھی نمایاں ہے، انہوں نے کیپشن میں لکھا کہ ہاں! میں مانتی ہوں، اس زندگی میں بھی اور اپنی تمام زندگیوں میں بھی۔

یہ جوڑا 2016 میں میڈرڈ کے گچی سٹور میں ملاقات کے بعد سے ساتھ ہے، دونوں کے 3 مشترکہ بچے ہیں اور وہ رونالڈو کے بڑے بیٹے کرسٹیانو جونیئر کی بھی پرورش کر رہے ہیں۔

انگوٹھی کے چرچے
منگنی کی انگوٹھی ایک دلکش اوول کٹ ہیرے پر مشتمل ہے جو ایک نفیس بینڈ پر جڑی ہوئی ہے، ہسپانوی میڈیا کے مطابق یہ پتھر 10 سے 15 کیرٹ وزنی ہے اوراس کی مالیت 10 سے 50 لاکھ ڈالرکے درمیان ہے۔

جیولری ماہرین کے مطابق یہ انگوٹھی 25 سے 30 کیرٹ وزنی ہے جبکہ مختلف ذرائع نے اس کی قیمت 20 لاکھ سے 50 لاکھ ڈالر کے درمیان بتائی ہے جو اس کی شفافیت اور ڈیزائن پر منحصر ہے۔

اس وقت سعودی عرب کے کلب النصر کے لیے کھیلنے والے رونالڈو ماضی میں انٹرویوز میں کہہ چکے ہیں کہ وہ جارجینا سے شادی کریں گے لیکن جب وقت مناسب ہو گا۔

یہ جوڑا ذاتی مشکلات کا بھی سامنا کر چکا ہے، جن میں 2022 میں اپنے جڑواں بچوں میں سے ایک کی پیدائش کے وقت موت بھی شامل ہے لیکن تقریباً ایک دہائی سے وہ ایک ساتھ ہیں۔

یہ منگنی ایسے وقت میں ہوئی ہے جب رونالڈو سعودی پرو لیگ کے جاری سیزن میں مصروف ہیں اور دنیا کے سب سے زیادہ معاوضہ لینے والے کھلاڑیوں میں شمار ہوتے ہیں۔