نیویارک: (دنیا نیوز) فرانسیسی ٹینس سٹار اور سابق اوپن چیمپئن یلینا اوسٹا پینکو نے امریکی ٹینس کھلاڑی ٹیلر ٹاؤن سینڈ سے ان پڑھ کہنے پر معذرت کر لی۔
یو ایس اوپن کے دوسرے راؤنڈ میں ٹاؤن سینڈ نے اوسٹا پینکو کو 5-7، 1-6 سے شکست دی تھی، میچ کے اختتام پر دونوں کھلاڑیوں کے درمیان تلخ کلامی ہوئی جب اوسٹا پینکو نے حریف کے لیے نیٹ کورڈ شاٹ پر معافی نہ مانگنے پر ‘ان پڑھ’ اور ‘بغیر حیثیت’ کے الفاظ استعمال کیے۔
ٹاؤن سینڈ نے بعد میں بتایا کہ وہ اوسٹا پینکو کے ان ریمارکس سے دکھی ہوئیں لیکن انہیں نسلی رنگ دینے سے گریز کیا، تاہم سابق عالمی نمبر ون ناؤمی اوساکا نے کہا کہ ایک سیاہ فام کھلاڑی کو ان پڑھ کہنا سب سے تکلیف دہ جملوں میں سے ایک ہے۔
اوسٹا پینکو نے انسٹاگرام پر وضاحت دی کہ انگریزی ان کی مادری زبان نہیں ہے اور ’ایجوکیشن‘ سے مراد دراصل ٹینس کے آداب تھے مگر انہیں اندازہ ہے کہ ان الفاظ سے کئی لوگوں کو دکھ پہنچا، وہ ایک کھلاڑی اور انسان کے طور پر سیکھنے کی کوشش کر رہی ہیں۔
ٹاؤن سینڈ کا کہنا تھا کہ انہیں اوسٹا پینکو کی ذاتی معافی موصول نہیں ہوئی لیکن عوامی معافی خوش آئند ہے، ان کے مطابق اوسٹا پینکو نے اپنی توقعات دوسروں پر مسلط کرنے کی کوشش کی اور جب انہیں اپنی مرضی کا ردعمل نہ ملا تو وہ غصے میں آ گئیں۔
میچ کے بعد اوسٹا پینکو کو کورٹ سے جاتے وقت ناظرین نے بُوؤ کیا جب کہ ٹاؤن سینڈ نے مداحوں کے ساتھ بھرپور جشن منایا، اوسٹا پینکو نے الزامات کی تردید کرتے ہوئے کہا کہ وہ کبھی نسل پرست نہیں رہیں اور سب قوموں کا احترام کرتی ہیں۔
