لاہور: (دنیا نیوز) پاکستانی فائٹرز نے آئی ایم ایم اے ایف ورلڈ چیمپئن شپ 2025 میں شاندار کارکردگی دکھا کر دنیا بھر میں نام روشن کر دیا۔
پاکستانی فائٹرز نے بہترین پرفارمنس دکھاتے ہوئے کئی عالمی چیمپئنز کو شکست دی، لائٹ ویٹ کیٹیگری میں شہاب علی نے یوکرین، زیمبیا اور تاجکستان کے چیمپئن فائٹرز کو شکست دی، شہاب علی کو فائٹر آف دی ٹورنامنٹ کا نام دیا گیا۔
اسٹراؤ ویٹ کیٹگری میں عبدالمنان نے زیمبیا کے فائٹر اور موجودہ عالمی چیمپئن علی یور سوونبردیئف کو شکست دی، فیدر ویٹ میں ایان حسین نے بلغاریہ کے قادرجان عیسیٰ کو مات دی۔
پاکستانی پروفیشنل فائٹر اسماعیل خان نےآذربائیجان کے حریف کو پہلے ہی راؤنڈ میں ناک آؤٹ کر کے کامیابی حاصل کی۔
پاکستانی خاتون فائٹر بانو بٹ شدید انجری کا شکار ہوئیں، بازو فریکچر ہو گیا، علاج جاری ہے، بانو بٹ کے تمام علاج کے اخراجات فیڈریشن نے ذاتی طور پر برداشت کیے۔
پاکستان مکسڈ مارشل آرٹس فیڈریشن کے صدر عمر احمد کو آئی ایم ایم اے ایف ایشیا بورڈ میں ساؤتھ ایشیا کا ڈائریکٹر مقرر کیا گیا۔
صدر مکسڈ مارشل آرٹس فیڈریشن عمر احمد نے کہا کہ یہ فیڈریشن کی صلاحیت کا ثبوت ہے کہ وہ عالمی سطح کے شوقیہ فائٹرز کو پروفیشنل کیریئر تک لے جا رہی ہے، عالمی سطح پر پاکستان اب مکسڈ مارشل آرٹس کی دنیا میں ایک ابھرتی ہوئی طاقت کے طور پر تسلیم کیا جا رہا ہے۔
عمر احمد نے کہا کہ حکومتِ پاکستان کی جانب سے کسی قسم کی براہِ راست مالی امداد فراہم نہیں کی گئی۔
واضح رہے کہ جارجیا میں ہونے والے ایونٹ میں 72 ممالک کے 800 سے زائد فائٹرز نے حصہ لیا، پاکستان کی نمائندگی 10 رکنی ٹیم نے کی۔
