لاہور: (دنیا نیوز) لاہور سمیت پنجاب بھر میں ڈینگی کے مریضوں کی تعداد میں روز بروز اضافہ ہوتا جا رہا ہے، گزشتہ چوبیس گھنٹوں میں 72 کنفرم مریض رپورٹ ہوئے ہیں۔
صوبائی دارالحکومت لاہور میں 16 نئے مریضوں کی تصدیق ہوئی، جس کے بعد شہر میں ڈینگی کے مریضوں کی تعداد 307 تک پہنچ گئی ہے، پنجاب بھر میں مجموعی طور پر ڈینگی کے کنفرم مریضوں کی تعداد 1620 تک پہنچ چکی ہے۔
شہر میں ڈینگی کے مشتبہ مریضوں کی تعداد میں تیزی سے اضافہ جاری ہے، رواں سال شہر میں ڈینگی کے مریضوں میں خطرناک حد تک اضافہ ہونے کا خدشہ ہے۔
محکمہ صحت پنجاب نے شہریوں کو احتیاطی تدابیر اختیار کرنے کی ہدایت کی اور تاکید کی ہے کہ وہ اپنے گھروں اور اردگرد کے علاقوں میں پانی کے کھڑے ہونے کو روکیں تاکہ مچھروں کی افزائش کو کم کیا جا سکے۔
