لاہور: (دنیا نیوز) پنجاب کے میڈیکل اور ڈینٹل کالجوں میں داخلے کیلئے ایم ڈی کیٹ امتحان کی تاریخ کا اعلان کر دیا گیا۔
ایم ڈی کیٹ امتحان 26 اکتوبر کو ہوگا، ایم ڈی کیٹ امتحان یونیورسٹی آف ہیلتھ سائنسز کے زیر اہتمام صوبے کے 12 شہروں میں لیا جائے گا۔
اس سال پنجاب میں 50 ہزار 458 اُمیدواروں نےایم ڈی کیٹ امتحان کیلئے رجسٹریشن کروائی ہے، یو ایچ ایس اور محکمہ سپیشلائزڈ ہیلتھ کیئر نے ایم ڈی کیٹ کے انعقاد کی تیاریاں تیز کر دیں۔
محکمہ سپشلائزڈ ہیلتھ کیئر نے 12 اضلاع کے ڈپٹی کمشنر کو ایم ڈی کیٹ کی تیاریوں کیلئے مراسلہ جاری کر دیا، ایم ڈی کیٹ کے دن لاہور سمیت 12 شہروں میں 26امتحانی مراکز پر ہائی الرٹ رہے گا۔
ریسکیو 1122، نادرا، محکمہ صحت، ٹریفک پولیس اور سیکورٹی اہلکار فرائض سر انجام دیں گے، محکمہ داخلہ پنجاب کو ٹیسٹ والے دن امتحانی مراکز پر دفعہ 144 کے نفاذ کیلئے درخواست دے دی گئی۔
امتحانی عملے کی تعیناتی کیلئے محکمہ ہایئر ایجوکیشن اور محکمہ سکول ایجوکیشن کو بھی مراسلہ جاری کر دیا گیا، امتحانی مراکز پر سخت سکیورٹی اور امن و امان کی صورتحال کیلئے آئی جی پنجاب کو بھی مراسلہ بھیجا گیا ہے۔
ایم ڈی کیٹ کے انعقاد کے حوالے سے یو ایچ ایس میں بھی تیاریاں جاری ہیں، امتحان کے شفاف انعقاد کے لیے سینئر فیکلٹی کو ڈیوٹیاں تفویض کر دی گئیں، تمام امتحانی عملے کی سکیورٹی کلیئرنس بھی کروائی جارہی ہے۔
وائس چانسلر یو ایچ ایس پروفیسر احسن وحید راٹھور تمام تیاریوں کی خود نگرانی کررہے ہیں۔
