نیویارک: (ویب ڈیسک) مردوں میں کینیا کے بینسن کپروٹو اور خواتین میں کینیا ہی کی ہیلن اوبیری نے نیویارک میراتھون 2025 کے ٹائٹلز اپنے نام کر لیے۔
نیویارک میراتھون 2025ء کا اختتام نہایت سنسنی خیز رہا جس سے شائقین کافی پرجوش رہے، کینیا کے کپروٹو نے 2 گھنٹے 8 منٹ 9 سیکنڈ میں فنش لائن عبور کی جبکہ الیگزینڈر موٹیسو محض ایک سیکنڈ سے بھی کم فرق سے رنر اپ قرار پائے۔
خواتین کی دوڑ کینیا کی ہیلن اوبیری نے 2 گھنٹے 19 منٹ 51 سیکنڈ میں جیت کر ریکارڈ بنایا، خاتون شیرون لوکیڈی 16 سیکنڈ کے فرق سے دوسری پوزیشن پر رہیںم، مردوں کی وہیل چیئر ریس میں سوئٹزرلینڈ کے مارسل ہوگ کامیاب قرار پائے، خواتین کی وہیل چیئر ریس امریکی سوسانہ سکارونی نے جیت لی۔
واضح رہے کہ 50 ہزار سے زائد رنرز نے 42 کلومیٹر طویل ریس میں حصہ لیا، نیویارک میراتھون میں 20 سے زائد پاکستانی رنرز بھی شریک تھے، سارہ طہور نے 3 گھنٹے 34 منٹ میں ریس مکمل کرکے سکس سٹار فنشر کا اعزاز حاصل کیا، اوورسیز پاکستانی عائشہ قمر نے بھی 3 گھنٹے 16 منٹ میں میراتھون مکمل کی۔
