واشنگٹن (نیٹ نیوز ) امریکی ماہرین نے کہا ہے کہ شراب نوشی خواہ کم ہو یا زیادہ سات خطرناک ترین کینسر کی وجہ بن سکتی ہے۔ امریکن سوسائٹی آف کلینکل اونکولوجی ( اے ایس سی او) کے شعبہ کینسرکے ماہرین کی تحقیق سے معلوم ہوا کہ شراب نوشی جتنی بڑھے گی کینسر کے خطرات اتنے ہی زیادہ ہونگے ۔
شراب زیادہ پینے سے جگر، منہ، چھاتی، بڑی آنت اور دیگر طرح کے کینسر کے خطرات بڑھ جاتے ہیں۔ ماہرین کے مطابق2013 میں 73 فیصد امریکی شراب نوشی کرتے تھے جن میں سے 13 فیصد بھرپور شراب نوشی کے عادی تھے ۔
اے ایس سی او کے مطابق اس بات کا ثبوت واضح ہے کہ شراب کئی طرح کے کینسر کی وجہ ہے جبکہ پیٹ اور لبلبے کا کینسر بھی شراب نوشی سے ہی لاحق ہوتا ہے ۔
اس رپورٹ کی مرکزی مصنفہ نیول لوکونٹے کہتی ہیں کہ شراب کسی بھی قسم کی ہو اس سے کینسر ہوسکتا ہے ۔ سر، گردن اور ایسوفیگس کے کینسر کی اہم وجہ شراب میں موجود ایسٹلڈی ہائیڈ مرکب ہے ۔
