اوکاڑہ: (دنیا نیوز) اوکاڑہ کے نواحی علاقے کوٹ شاہ مشتاق میں نوجوان فیصل شہزاد نے چھوٹا جنگی ڈرون تیار کرکے سب کو حیران کر دیا، چھوٹے طیارے کی فضا میں کرتب دکھانے کی فوٹیج سوشل میڈیا پر وائرل ہو گئی۔
اوکاڑہ کے نواحی علاقے کوٹ شاہ مشتاق میں نوجوان فیصل شہزاد نے اپنی مدد آپ کے تحت چھوٹا جنگی ڈرون تیار کر کے شہریوں کو حیران کر دیا۔ پاکستانی جنگی طیارے جے ایف تھنڈر 17کی طرز پر بنائے جانے والے اس چھوٹے جہاز نے فضا میں ایسے کرتب دکھائے کہ دیکھنے والے عش عش کر اٹھے اور نوجوان فیصل شہزاد کی صلاحیتوں کو بے حد سراہا۔
طیارے کے کرتب دکھانے کی فوٹیج سوشل میڈیا پر وائرل ہو گئی، اس حوالے سے نوجوان فیصل شہزاد کا کہنا تھا کہ یہ اس نے اپنی جیب خرچ جمع کرکے بنایا ہے اگر حکومت اس کے ساتھ تعاون کرکے اور حکومتی سطح پر بہتر پلیٹ فارم مہیا کرے تو اس کی صلاحیتوں میں مزید نکھار آ سکتا ہے اور وہ مزید بہتر کام کر سکتا ہے۔
