واشنگٹن: (ویب ڈیسک) مائیکرو سافٹ کے شریک بانی بل گیٹس نے کہا ہے کہ چیٹ جی پی ٹی جیسی ٹیکنالوجی ہماری دنیا بدل دے گی۔
غیرملکی اخبار کو دیے گئے انٹرویو میں بل گیٹس نے کہا کہ آرٹی فیشل انٹیلی جنس (اے آئی) ٹیکنالوجی میں بہتری موجودہ عہد کی اہم ترین پیشرفت ہے، اے آئی ٹیکنالوجی پر مبنی چیٹ جی پی ٹی نامی چیٹ بوٹ ہماری دنیا کو بدل دے گا،
انہوں نے مزید کہا کہ اب تک اے آئی ٹیکنالوجی لکھ اور پڑھ سکتی تھی مگر مواد کو سمجھنے سے قاصر تھی، مگر چیٹ جی پی ٹی جیسے نئے پروگرامز خطوط یا رسیدیں تحریر کرکے دفتری ملازمتوں کو زیادہ بہتر طریقے سے دیں گے ۔
بل گیٹس نے 1975 میں مائیکرو سافٹ کی بنیاد رکھی تھی اور 2 دہائی سے زائد عرصے تک اس کی قیادت کرتے رہے، پھر 2000 میں سی ای او کے عہدے کو چھوڑ دیا تھا۔
اب ان کی قائم کردہ کمپنی نے چیٹ جی پی ٹی کو سرچ انجن بنگ کا حصہ بنایا ہے جس کے بعد گوگل کی جانب سے بھی اسی طرح کی ٹیکنالوجی کو متعارف کرانے کا اعلان کیا گیا۔
