واشنگٹن : ( ویب ڈیسک ) امریکی ریاست الاسکا کی فضا میں 40 ہزار فٹ کی بلندی پر پرواز کرنے والی پر اسرار شے کو لڑاکا طیارے نے مار گرایا، بغیر پائلٹ فضا میں موجود پراسرار شے چھوٹی کار کے سائز کی تھی جسے صدر جو بائیڈن کے فیصلے بعد گرایا گیا۔
ترجمان وائٹ ہاؤس جان کربی نے بتایا کہ الاسکا کی فضا میں موجود شے 40,000 فٹ (12,000 میٹر) کی بلندی پر سفر کر رہی تھی اور فضائی ٹریفک کیلئے ممکنہ خطرہ تھی، ہمیں نہیں معلوم کہ اس کا مالک کون ہے۔
.jpg)
کربی نے کہا کہ دو لڑاکا طیاروں نے آبجیکٹ کے قریب پہنچ کر اندازہ لگایا کہ پراسرار چیز میں کوئی پائلٹ نہیں اور یہ معلومات صدر بائیڈن کو فراہم کی گئیں جس کے بعد انہوں نے اسے مارنے کا فیصلہ کیا، ہم اپنی فضائی حدود کے بارے میں چوکس رہیں گے، صدر ہماری قومی سلامتی کے مفادات کے تحفظ کے لیے اپنی ذمہ داریوں کو سب سے اہم سمجھتے ہیں۔
دوسری جانب پینٹاگون کے پریس سیکرٹری بریگیڈئر جنرل پیٹ رائڈر نے تصدیق کی کہ اینکریج میں ایک F-22 جیٹ نے سائڈ ونڈر میزائل سے اس چیز کو جو نامعلوم رفتار سے آگے بڑھ رہی تھی مار گرایا ہے اور اب تک اس کا کافی مقدار میں ملبہ برآمد کیا جا چکا ہے جسے جہازوں پر لوڈ کرنے کے بعد تجزیے کے لیے لیبز میں لے جایا جائے گا۔
واضح رہے کہ یہ واقعہ امریکا میں چینی مشتبہ جاسوس غبارے کو مار گرانے کے ایک ہفتے کے بعد پیش آیا ہے۔
