کیلیفورنیا: (ویب ڈیسک) سپیس ایکس کے بانی اور ٹیسلا کے مالک ایلون مسک نے ’گروک 3‘ چیٹ بوٹ متعارف کرانے کا اعلان کر دیا۔
چیٹ بوٹ اور چیٹ جی پی ٹی کا مدِمقابل ’گروک تھری‘ آج متعارف کرایا جائے گا۔
دبئی میں ورلڈ گورنمنٹس سمٹ سے ویڈیو کال کے ذریعے خطاب کرتے ہوئے ایلون مسک نے گروک تھری کی جدیدیت اور صلاحیتوں کو اجاگر کرتے ہوئے کہا کہ تجربات کے دوران اس نے موجودہ تمام چیٹ بوٹس کو پیچھے چھوڑ دیا ہے جو ایک اچھی پیشرفت ہے۔
غیر ملکی خبر رساں ادارے کی رپورٹ کے مطابق انہوں نے کہا کہ ایکس اے آئی کے ’گروک تھری‘ چیٹ بوٹ کی تقریب رونمائی امریکی وقت کے مطابق آج (بروز پیر) رات 8 بجے کی جائے گی۔
گذشتہ روز مسک کی سربراہی میں ایک سرمایہ کار گروپ نے اوپن اے آئی کے غیر منافع بخش اثاثے خریدنے کیلئے 97.4 بلین ڈالر کی پیشکش کی، یہ اقدام دنیا کے امیر ترین شخص کی جانب سے مصنوعی ذہانت کی اس کمپنی کے خلاف ایک اور چال کے طور پر دیکھا جا رہا ہے۔
اوپن اے آئی کا کہنا ہے کہ وہ بہترین مصنوعی ذہانت ماڈلز کی ترقی کیلئے درکار سرمایہ حاصل کرنے کیلئے ایک منافع بخش ادارہ بننا چاہتی ہے۔
خیال رہے کہ ایلون مسک کی کمپنی ایکس اے آئی نے گروک 2 ماڈل اگست 2024 میں متعارف کرایا تھا جو تصاویر تیار کرنے کی صلاحیت رکھتا ہے، ستمبر 2024 میں کمپنی کی جانب سے اس ماڈل کو تصاویر کا تجزیہ کرنے کی صلاحیت سے لیس کیا گیا تھا۔
