نیویارک: (ویب ڈیسک) امریکی نجی کمپنی کے خلائی مشن نے چاند پر کامیاب لینڈنگ کر لی، ’’فائر فلائی ایرو سپیس‘‘ کا یہ دوسرا کامیاب مشن ہے۔
غیر ملکی خبر رساں ادادے کی رپورٹ کے مطابق ایک امریکی کمپنی نے کامیابی کے ساتھ اپنا خلائی جہاز چاند پر اتار لیا، مذکورہ کامیابی کسی بھی نجی مشن کے ذریعے حاصل کی گئی دوسری بڑی کامیابی ہے اور پہلی بار کسی نجی مشن نے عمودی (اپ رائٹ ) لینڈنگ کی ہے۔
ٹیکساس کے شہر آسٹن کے کنٹرول روم سے بلیو گھوسٹ لینڈر کے چاند پر اترنے کے عمل کی نگرانی کی گئی، چاند پر بالکل درست لینڈنگ کرنے والا یہ پہلا پرائیوٹ مشن ہے جو امریکی خلائی ادارے ناسا کیلئے تجربات کرے گا۔
فائر فلائی ایرو سپیس کا مشن جنوری کے وسط میں لانچ کیا گیا تھا، آسٹن میں موجود مشن کنٹرول ٹیم میں اس وقت خوشی کی لہر دوڑ گئی جب کمپنی کے سی ای او جیسن کم نے تصدیق کی کہ خلائی جہاز مستحکم اور عمودی پوزیشن میں ہے۔
بلو گھوسٹ کے پروگرام منیجر رے ایلنزورتھ نے بتایا کہ لینڈر ہدف سے صرف 100 میٹر کے اندر اترا جو کہ انتہائی درستگی کی علامت ہے۔
انہوں نے کہا کہ ہم نے لینڈنگ کے دوران دو بار خطرے سے بچاؤ کیلئے خودکار طور پر راستہ بدلا، جس کا مطلب ہے کہ ہمارا سافٹ ویئر بالکل ویسے ہی کام کر رہا تھا جیسے اسے کرنا چاہیے تھا۔
