سلیکان ویلی : (ویب ڈیسک) گوگل کے مصنوعی ذہانت کے حامل چیٹ بوٹ جیمنائی میں تصاویر کو اپ ڈیٹ، ایڈیٹ کرنے کی سہولت متعارف کرا دی گئی ہے۔
اب صارفین چیٹ بوٹ کے چیٹ انٹرفیس کے اندر تصاویر کو ایڈٹ کرسکیں گے اور تصاویر یا دیگر فائلز کو تجزیے کیلئے بھی بھیج سکیں گے۔
یہ ایڈیٹر کسی بھی اپ لوڈ کی گئی تصویر یا جیمنائی کی تیار کردہ تصویر کو اے آئی ٹیکنالوجی کی مدد سے جادوئی انداز میں تبدیل کر سکتا ہے، جیمنائی کو تصویر میں تبدیلیوں کا صرف بتانا پڑے گا۔
تصاویر کے بیک گراؤنڈ کو بھی تبدیل کرسکیں گے یا لوگوں کو اپنی پسند کی چیزیں بھی پہنا سکیں گے، جیمنائی سے گفتگو کے دوران متعدد بار تصویر کو ایڈٹ کرسکتے ہیں، پہلے کی جانے والی تبدیلیوں کو ریورس بھی کرایا جا سکتا ہے۔
گوگل کا دعویٰ ہے کہ یہ اے آئی ایڈیٹر متعدد کام کرسکتا ہے، اساتذہ اس کی مدد سے اسٹوری بورڈ کیلئے خاکے فوری طور پر تیار کرسکتے ہیں، ڈیزائنرز اپنی پراڈکٹ فوٹوز کا پورٹ فولیو تیار کرسکتے ہیں یا آرکیٹیکٹ عمارات کے ڈیزائن کو پیش کرنے کیلئے بھی اسے استعمال کرسکتے ہیں۔
اس سے قبل جیمنائی میں صرف ایک فائل کو اپ لوڈ کرنے کی اجازت تھی مگر اب اسے ختم کر دیا گیا ہے، اب صارفین تصاویر، پی ڈی ایف یا دیگر فائلز کو بیک وقت اپ لوڈ کرکے ان کا تجزیہ کروا سکتے ہیں۔
گوگل کے مطابق اے آئی سے ایڈٹ کی گئی ہر تصویر میں 2 واٹر مارکس ہوں گے جن میں سے ایک واضح ہوگا جبکہ دوسرے کو سافٹ وئیر سے دیکھنا ممکن ہوگا، ایسے فلٹرز بھی ایڈ کیے جائیں گے جو نامناسب درخواستوں کو فوری رد کر دیں گے۔
